METRO MANILA, Philippines — Pinuri ni House Speaker Martin Romualdez nitong Miyerkules si Senate President Francis “Chiz” Escudero dahil sa paghahanda sa Senado para sa impeachment trial ni Vice President Sara Duterte.
Ayon kay Romualdez, pinatunayan ni Escudero ang paninindigan na sumunod sa proseso para sa patas na paglilitis kay Duterte.
Aniya, nagawa na ng Kamara ang bahagi nito nang isakdal nila si Duterte sa ibat-ibang mga reklamo at agad na ipinadala sa Senado ang Articles of Impeachment.
“Nakita natin sa pagbisita ng ating House Secretary General sa Senado ang kahandaan ng ating mga kasamahan sa Mataas na Kapulungan. Napakahalaga ng maaga at maayos na paghahanda upang matiyak ang kaayusan pagdating ng impeachment trial,” sabi pa ni Romualdez.
Kahapon, binisita ni House Secretary General Reginald Velasco ang Senate Session Hall kung saan isasagawa ang paglilitis at sumunod sa Sen. Arturo Tolentino Room, na inilaan para sa House prosecuting team.
BASAHIN: House team sinilip VP Duterte impeachment trial court sa Senado
Kasabay nito, tiniyak ni Romualdez na handang-handa na ang binuong 11-man prosecution panel na ilatag ang mga reklamo at mga ebidensya laban kay Duterte ayon sa mga batas.
