METRO MANILA, Philippines — Ikinukunsidera ng Department of Agriculture (DA) ang pagpapataw ng maximum suggested retail price (MSRP) sa karne ng baboy dahil sa mataas na presyo.
Ayon kay Agriculture Assistant Secretary Arnel de Mesa, pinag-aaralan na rin ang pagpapataw ng multa para matuldukan ang pagsasamantala ng mga negosyante.
Nagbabala si de Mesa na ang mga mahuhuling nagsasamantala sa presyo ng karne ay maaring maharap sa kasong paglabag sa Anti-Agricultural Economic Sabotage Act.
BASAHIN: P58 per kg MSRP sa imported rice ipapatupad sa Metro Manila muna
Kasama din aniya sa kanilang iimbestigahan ay ang smuggling ng imported pork.
Dagdag pa nito, ang maaring ipatong sa farmgate price ng karne ng baboy ay hindi dapat humigit ng husto sa P100 kada kilo.
Ngunit base na rin sa pagbabantay ng kagawaran sa mga presyo sa mga palengke sa Metro Manila, P390 hanggang P460 ang bentahan ng kada kilo ng liempo at P375 naman sa kasim.
Una nang sinabi ni Agriculture Secretary Francis Tiu-Laurel na sapat ang suplay ng karne ng baboy kayat labis nilang ipinagtataka ang pagtaas ng presyo nito sa mga pamilihan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.