METRO MANILA, Philippines — Naglabas ng warrant of arrest ang isang korte sa Maynila laban sa 29 na retirado at aktibong pulis kaugnay sa operasyon noong 2022 na humantong sa pagkakasamsam ng P6.7 bilyong halaga ng shabu.
Ang mga nasabing retirado at aktibong pulis ay nahaharap sa mga kasong paglabag sa Comprehensive Drugs Act of 2002.
Kabilang sa mga ipinaaaresto ni Presiding Judge Gwyn Calina ng RTC Branch 44 ay sina dating PNP deputy chief for Pperations, Lt. Gen. Benjamin Santos at sina Brig. Gen. Narciso Domingo, Col. Julian Olonan, at Lt. Col. Dhefry Punzalan.
BASAHIN: 6 pulis-Maynila sibak dahil sa hold-up shooting viral video
Nagtakda ang korte ng P200,000 na piyansa para sa 29 na akusado.
Inasunto sila ng Department of Justice (DOJ) sa paniniwalang “palabas” lamang ang pagkakahuli kay Police Master Sgt. Rodolfo Mayo noong Oktubre 9, 2022 at pagkakadiskubre ng 990 kilo ng shabu sa opisina ng WPD Lending sa Santa Cruz, Maynila.
Nabatid ng Radyo Inquirer na kabilang sa ebidensiya ng DOJ sa alegasyon na “palabas” lamang ng mga pulis ang operasyon ay ang kuha ng isang CCTV camera sa kalapit na gusali.
Lumabas na unang naaresto sa Bambang, Tondo, si Mayo ng walang arrest warrant at wala din record ng sinasabing dalawang kilo ng shabu na nakumpiska sa kanya.
Kasunod nito ay dinala na siya sa opisina ng WPD Lending at hinintay ang pagdating ng mga matataas na opisyal ng pambansang pulisya.