METRO MANILA, Philippines — Tinanggal sa puwesto ang apat na opisyal ng Bureau of Correction (BuCor) bunga ng insidente ng pananaksak sa New Bilibid Prison (NBP) sa Muntinlupa City noong nakaraang linggo.
Ayon sa BuCor, dahil sa insidente na ikinasawi ng isang bilanggo at ikinasugat ng dalawang iba pa pinagdudahan ang sistema ng seguridad sa NBP.
Idiniin ni BuCor Director General Gregorio Pio Catapang na dapat naka-alerto sa lahat ng oras ang kanilang mga tauhan partikular na ang mga nagbabantay sa mga bilanggo.
BASAHIN: BuCor: 1,000 bilanggo pinalaya ngayong Kapaskuhan
Aniya nararapat lamang na may managot dahil sa pagpapabaya.
Ang tinanggal sa puwesto ay sina acting Commander of the Guards Louie Rodelas at Corrections Officers 1 Christian Alonzo, Joshua Mondres, at Glicerio Cinco Jr.
Una na rin hiniling ni Catapang sa National Bureau of Investigation, Commission on Human Rights at pambansang pulisya na magsagawa ng hiwalay na imbestigasyon sa insidente.