Ipinagmalaki ni Senate President Francis “Chiz” Escudero na karamihan sa 72 na panukala na ipinasa ng Senado at naging batas ay bunga ng mga pagdinig ng mga komite.
Ayon kay Escudero, ang 72 na isinabatas na panukala ay mula noong nakaraang Hulyo 25 hanggang sa huling araw ng sesyon noong Disyembre 18, at ito raw ay maitatala sa kasaysayan ng Senado na isa sa mga produktibong sesyon.
Sinabi pa ng senador na ang mga panukalang batas ay makatutulong sa mga programa at plano ng administrasyong Marcos para sa ekonomiya, sobereniya at pag-unlad ng buhay ng bawat Filipino.
Pinuri rin ni Escudero ang mga kapwa senador at mga kawani ng Mataas na Kapulungan ng Kongreso sa kanilang dedikasyon at sakripisyo.
Nabanggit niya na sa kabuuan ay nakapagpasa sila ng 108 panukalang batas.
“Nais kong iparating ang aking taos-pusong pasasalamat sa ngalan hindi lamang ng ibang empleyado’t senador, kundi sa ngalan ng sambayanan. Alam ko po na marami tayong oras na ginugol at trabahong nagawa para at alang-alang sa ating bansa at mga kababayan. At sana po ito’y hindi makalimutan ng ating mga kababayan,” ani Escudero.
Tiniyak nito na marami pang panukalang batas ang ipapasa ng Senado sa pagbabalik ng sesyon sa Enero 6.