METRO MANILA, Philippines — Sa lungsod ng Baguio isasagawa ngayon araw, Biyernes, ika-17 ng Mayo, ang una sa tatlong regional consultations ukol sa panukalang Charter change— ang pag-amyenda sa ilang probisyon sa Saligang Batas..
Una nang nakapagsagawa ng limang public hearings ukol sa Resolution of Both Houses No. 6, na layong buksan sa mga banyaga ang pagmamay-ari ng public utilities, higher education, at advertising sector sa bansa.
Pangungunahan ni Sen. Sonny Angara ang pagdinig bilang naitalagang chairman ng binuong Subcommittee on Constitutional Amendments.
BASAHIN: Cha Cha, hindi ulam sa sikmura ng Filipino – Sen. Nancy Binay
BASAHIN: ‘Con-con’ para sa ‘Cha cha’ lusot na sa Kamara
Aniya nais nilang marinig ang opinyon sa panukala mga local leaders, negosyante, at mga lider sa higher educational institutions sa Luzon, Visayas at Mindanao.
Sinabi ni Angara na naging makabuluhan ang mga naunang pagdinig para sa isinusulong na “economic Charter change” dahil sa pagdalo ng mga dating mahistrado ng Korte Suprema, gayundin ng mga constitutional, education, at business experts.
Inaasahan na dadalo sa public consultation ngayon dito sina Senate President Juan Miguel Zubiri, Senate President Pro Tempore Loren Legarda, at sina Sens. Christopher Go at Ronald dela Rosa.
Sa susunod na linggo, nakatakdang magsagawa ng katulad na konsultasyon ang komite sa Cebu City at Cagayan de Oro City.