Nais ni San Juan City Mayor Francis Zamora na makaharap ang dalawa niyang kalungsod na inireklamo ang kulang na tulong-pinansiyal mula sa Tulong Panghanapbuhay sa Ating Disadvantaged/Displaced Workers.
Inimbitahan ni Zamora ang nagreklamo kay Sen. Raffy Tulfo na magtungo sa kanyang opisina para personal na maidulog sa kanya ang reklamo.
Ayon pa kay Zamora titiyakin niya na makakaharap nila ang mga kinatawan ng Department of Labor and Employment (DOLE), Department of Social Welfare and Development (DSWD), pambansang pulisya o National Bureau of Investigation (NBI) para mapalagay aniya ang loob ng nagreklamo.
Pagtitiyak pa ng alkalde na agad na aaksiyonan ang reklamo ng kanyang kalungsod.
Ito rin ang pagtitiyak niya sa isa pang nagreklamo sabay diin na hindi niya kukunsintihin ang mga maling gawain.
“Narinig ko din po na nabanggit ang tanggapan ng Mayor ng San Juan sa usapin na ito. Nakakalungkot na madali para sa ilan na magbintang ng walang patunay o basehan maliban sa sabi-sabi o hearsay,” ani Zamora.
Dagdag pa nito: Malinis po ang aking konsensiya at lalong bukas ang aking tanggapan na sagutin ang anumang isyu na ibinabato sa akin sa ngalan ng tunay na paglilingkod o ng dahil lamang sa politika.”