(Photo: PCG)
Nasagip ng mga tauhan ng Philippine Coast Guard (PCG) ang limang Filipinong mangingisda matapos banggain ng bulk carrier vessel na MV Tai Hang 8 ang sinasakyang nakahintong bangka na FBCA Ruel J sa karagatan malapit sa Paluan, Occidental Mindoro.
Ayon sa PCG, may nakalagay na flag ng China ang bulk carrier vessel na bumangga sa bangka ng mga Filipinong mangingisda.
Nakatanggap ng ulat kahapon ng 12:00 ng tanghali, Disyembre 6 ang PCG na nagpapasaklolo ang mga mangingisda.
Nakahinto ang bangka ng limang mangingisda at nakakabit sa payao na isang fish aggregating device nang banggain ng MV Tai Hang 8.
Sa salaysay ng mga mangingisda, iniwan lamang sila sa karagatan at hindi sinaklolohan matapos banggain ng MV Tai Hang 8.
Hindi pa naman matukoy ng PCG kung anong nationality ang mga sakay ng MV Tai Hang 8.
Nasa maayos na kalagayan naman ang mga mangingisda at dinala na sa Pandan Island sa Sablayan, Occidental Mindoro.
Nagsasagawa na ng imbestigasyon ang PCG kaugnay sa insidente.