Insurgency free na ang Palawan.
Pahayag ito ni Pangulong Ferdinand “Bongbong” Marcos Jr. sa pagdiriwang ng National Peace Consciousness Month sa Palawan.
Kumbinsido si Pangulong Marcos na epektibo ang pagtutulungan ng national government at mga lokal na pamahalaan sa prosesong pangkapayapaan.
Sabi ni Pangulong Marcos, kaya namumundok at nakikibaka ang mga rebelde dahil sa kawalan ng pag-asa at pinababayaan ng pamahalaan.
Pero nabago na aniya ang kaisipang ito dahil sa hatid na serbisyo, imprastraktura at oportunidad na ibinibigay ng pamahalaan sa mga rebelde.
Sabi ni Pangulong Marcos, dahil sa mga oportunidad, maraming rebelde na ang nagbalik loob sa pamahalaan.
Nararamdaman na kasi aniya ng mga rebelde ang malasakit hindi lamang ng pamahalaan kundi maging ng lokal na komunidad na handang suportahan ang kanilang buhay.
Kumpiyansa si Pangulong Marcos na magiging madali na ang usapan tungo sa kapayapaan para sa mga natitirang lugar na mayroong rebelde dahil nakikita nila gumaganda na ang lagay ng buhay ng mga dating kasamahan sa armadong grupo.