Umapila ang Land Transportation Franchising and Regulatory Board (LTFRB) sa transport groups na huwag nang ituloy ang binabalak na tatlong araw na tigil pasada ngayon buwan.
Ang binabalak na tigil-pasada ay kasabay ng ikalawang State of the Nation Address (SONA) ni Pangulong Marcos Jr., sa Hulyo 24 at tatagal hanggang Hulyo 26.
Sinabi naman ni LTFRB Board Member Mercy Jane Paras-Leynes na sakaling matuloy ang hindi pagpasada ng mga pampublikong-sasakyan, handa sila na bigyan ng alternatibong masasakyan ang mga komyuter.
“Nanawagan kami na hindi sana matuloy yung transport strike kasi ang hindi natin nakikita dito, hindi lang naman ito tungkol doon sa modernization tsaka yung mga stakeholders natin na affected by the implementation of the program,” pakiusap ni Leynes.
Aniya nakikipag-ugnayan na sila sa Department of Transportation (DOTr) at sa iba pang kinauukulang ahensiya para sa mga maaapektuhang mananakay ng mga pampublikong transportasyon.