Sa mga susunod na buwan ay maaring ilabas na ang desisyon ukol sa mga petisyon ng dagdag-sahod sa apat na rehiyon, ayon sa Department of Labor and Employment (DOLE).
Ayon kay Labor Undersecretary Ernesto Bitonio Jr., ang mga nakabinbing petisyon ay sa Central Luzon, Calabarzon, Western Visayas at Central Visayas regions.
Sinabi nito na magsasagawa ng mga pagdinig at konsultasyon ang regional wage boards sa apat na rehiyon ngayon buwan hanggang Setyembre.
Noong nakaraang linggo, inaprubahan ng National Capital Region Tripartite Wages and Productivity Board ang karagdagang P40 sa daily minimum wage sa mga manggagawa sa pribadong sektor.
Inaasahan na makikinabang dito ang may 1.1 milyong minimum wage earners sa Metro Manila.
Simula sa Hulyo 16, magiging P573 hanggang P610 na ang minimum wage sa Metro Manila depende sa sektor at bilang ng mga trabahador.