Nagpalabas ang Civil Aviation Authority of the Philippines (CAAP) ng tatlong notices to airmen (NOTAM) bunga ng mga tumaas na aktibidad ng tatlong bulkan sa bansa.
Sinabi ni CAAP spokesperson Eric Apolonio na sa naturang abiso, ipinagbabawal sa mga piloto ang paglipad malapit sa Bulkang Mayon, Taal at Kanlaon.
“In fact po, kalalabas lang noong ating notice to airmen ngayon. Iyong Mayon ho ay nasa Alert Level 2 pa rin at ‘yong ating pong Taal ay nasa Alert Level 1. Mayroon pong isa pa tayong ini-release na kalatas ngayon, itong Kanlaon po ngayon ay nasa Alert Level 1 din po,” ani Apolonio sa isang public briefing.
Aniya ang mga air traffic controllers ang magbibigay ng ligtas na ruta para sa mga eroplano.
Sinabi pa ni Apolonio na manatiling nakaantabay din ang mga pasahero sa maaring pagbabago sa schedule ng kanilang biyahe.