Estrada may apila para sa mga residente ng Pag-Asa Island

Umapila si Senador Jinggoy Estrada sa mga kasamahan sa Senado na bigyang atensyon ang mga residente ng Pag-Asa Island para umangat ang uri ng kanilang pamumuhay.   Ayon sa senador, hindi dapat maging dahilan ang pagiging isolated at remote ng Pagasa Island upang pabayaan na lamang ang mga nakatira roon.   Ipinaalala ni Estrada na obligasyon ng mga lingkod-bayad na tiyakin ang edukasyon, healthcare at kabuhayan ng mga residente ng isla.   Sa datos, kabuuang 350 ang sibilyang nananatili sa Pag-asa Island, kabilang na ang 73 bata.    Kinatigan naman ni Senate President Migz Zubiri ang apila ni Estrada sa pagsasabing may karapatan din ang mga residente ng Pagasa Island para sa mas maayos na pamumuhay bilang sila ay mga Pilipino.    Sinabi ni Zubiri na maaaring sa pagbalangkas nila ng 2024 national budget ay mabuhusan ng dagdag na pondo ang isla para sa kanilang mga imprastraktura at serbisyong kinakailangan.