Sasailalim sa pagsasanay ng Technical Education and Skills Development Authority (TESDA) ang mga mangingisda ng Oriental Mindoro na naapektuhan ng oil spill dulot ng paglubog ng MT Princess Empress.
Ang “re-skilling” at “upskilling” ng may 2.900 residente, ayon sa TESDA, ay gagawin sa pakikipagtulungan sa Department of Labor and Employment (DOLE).
Ang mga sasailalim sa pagsasanay ay mula sa mga bayan ng Naujan, Pola, Pinamalayan, Gloria, Bansud, Bongabong, Roxas, Mansalay, at Bulalacao.
Kabilang sa mga pagsasanay ay Oil Spill Response Training; Meat and Fish Processing; Bread Making; Hog Raising; Dressmaking; Service Motorcycle Small Engine System; Small Engine Repair; Pastry Making; at Sugar Concentration.
Tiniyak ni TESDA Director Gen. Danilo Cruz na handa silang magbigay tulong sa pamamagitan ng “skills training” at “livelihood programs” sa mga residente na lubhang naapektuhan ng oil spill.
Dagdag pa ni Cruz ang mga programa ay makakatulong sa mga benepisaryo na makahanap ng permanenteng pagkakakitaan.
“Hindi lang temporary employment ang ibinibigay ng DOLE, may component ‘yan na training. Bago ang temporary employment, kailangan ma-train din ang ating mga kababayan sapagkat after ng temporary employment, kailangan nilang magkaroon ng permanenteng trabaho.” aniya.