Bukas na sa publiko simula ngayon araw ang inayos at pinagandang Passenger Terminal Building (PTB) sa Port of Calapan, Oriental Mindoro.
Ayon kay Philippine Ports Authority (PPA) General Manager Jay Santiago na maituturing na “world class” ang PTB at ito ay may kapasidad ng 3,500 pasahero anumang oras mula sa dating 1,600.
Ito aniya ay may prayer room, mas magandang breastfeeding area, all gender restroom, high tech automated doors, escalators at elevators para sa mga pasaherong may pangangailangan.
Sabi pa ni Santiago, malaking tulong ang pasilidad lalo na ngayon papalit ang Semana Santa at marami sa mga Filipino ang maglalakbay sa pamamagitan ng karagatan.
“Tuwing peak season, nasa humigit kumulang 12,000 ang pasaherong gumagamit ng pantalan araw-araw na kung minsan ay nasa labas lamang ng lumang terminal ang mga naghihintay kaya naman inaasahan nating hindi na mangyayari ngayon yan dahil mas malaki na ang kapasidad ng bagong PTB sa Calapan Port,” sabi pa ng opisyal.
Diin niya ang proyekto ay bahagi ng inisyatibo ng kanilang ahensiya para mapagbuti pa ang kapakanan ng mga pasahero sa pamamagitan ng serbisyo na ibinibigay ng PPA.
“Laging kapakanan ng mga pasahero ang isinasalang-alang ng PPA sa ating mga proyekto. Kaya makakaasa ang ang publiko na hindi kami hihinto sa paggawa ng mga proyekto upang mas mapa-unlad pa ang sektor ng turismo, paggawa at transportasyon sa maraming lugar sa bansa,” pahayag pa ni Santiago.