Pumasa na sa third at final reading ang panukala na ang layon ay mabigyang linaw ang bagong batas na gumagabay sa termino sa opisina ng chief of staff at iba pang matataas na opisyal ng Armed Forces of the Philippines (AFP).
Inaprubahan ng lahat ng senador ang Senate Bill 1949, sa ilalim ng Committee Report No. 23 at inisponsoran ni Sen. Jinggoy Estrada.
Pinagtibay din sa panukala ang intensyon ng RA 11709 na matigil na ang ‘revolving door policy’ sa promosyon sa hanay ng mga matataas na opisyal ng hukbong-sandatahan.
“I hope that this measure will usher improved morale for our soldiers and officers of the Armed Forces of the Philippines. It sends a clear message that this Senate, their Senate, is one with our gallant soldiers and heroes as they perform their noble duty of protecting and defending our beloved country against aggressors and enemies,” ani Estrada sa pagkaka-apruba ng panukala.
Ibinalik sa 56 ang retirement age ng mga sundalo, maliban sa chief of staff at commanding generals ng Army, Navy at Air Force at superintendent ng Philippine Military Academy (PMA) na nakadepende sa pagtatapos ng kanilang ‘tour of duty’ o sa kagustuhan ng pangulo ng bansa.