Sinabi ni Senator Christopher Go na may pangangailangan na dagdagan ang presensiya ng mga awtoridad sa Ninoy Aquino International Airport(NAIA) kasunod nang pagtanggal ng scanners at x-ray machines sa airports.
Dapat din aniya paigtingin ang intelligence gathering ng mga awtoridad para tiyakin ang kaligtasan sa mga paliparan.
“Suportado ko naman ang desisyon na gawing mas maginhawa ang paglalakbay sa ating bansa, pero mas mabuting may sapat na pag-iingat pa rin,” aniya.
Nangangamba lang ang senador na maaring maging delikado sa NAIA sa mga may masamang balakin.
Binanggit pa nito ang nangyaring pambobomba sa Davao City noong 2003 at maaring mangyari ito sa NAIA kung luluwag ang security protocols.
“Siguraduhin nating ligtas ang ating mga airport at huwag pabayaan ang karapatan ng mga pasaherong naapektuhan.” dagdag pa ni Go.