Epektibo kaninang alas-tres ng hapon ay idineklara na bilang no-fly zone ang ibabaw ng Crocodile Farm sa Davao City kung saan ay kasalukuyang ginaganap ang thanksgiving party ni incoming President Rodrigo Duterte.
Nangangahulugan ito na bawal lumipad sa lugar ang mga eroplano, chopper pati na ang mga unmanned aerial vehicles tulad ng drone.
Bukod sa mga tauhan ng Philippine National Police at Armed Forces of the Philippines, naka-kalat na rin sa lugar para sa seguridad ng publiko ang ilang mga tauhan ng Presidential Security Group (PSG).
Inaasahang hindi bababa sa 200,000 katao ang pupunta sa venue na binuksan kaninang ala-una ng hapon.
Bukod sa mga kilalang celebrities, nakatakda ring magpakita ng kanilang talents ang ilang mga singers, banda at mga dance groups mula sa Davao City at iba pang lugar sa Mindanao.
Magiging highlight ng kasiyahan ang pagsasalita ni Duterte sa publiko mamayang alas-diyes ng gabi.