Para mapabilis ang pagpapasigla ng ekonomiya ng bansa, hinikayat ni Senator Sonny Angara ang gobyerno na palakasin ang high value industries at high paying jobs.
Sinabi ito ni Angara kasabay nang pagpapahayag ng pagkabahala na nauungusan na ang Pilipinas ng ibang kasapi ng ASEAN sa usapin ng paglago ng ekonomiya.
Dapat aniyang seryosong pag-aralan ang mga industriya sa bansa upang ang mga ito ay matulungan.
“While our trade deficit is worsening, our neighbors such as Vietnam and Indonesia are posting surpluses. Is this a sustainable direction for us as a country or do we want to reverse this? We need to find out if we are on the right track in terms of producing higher paying jobs and higher value industries. If the data shows we are not, then we have to reverse track at some point,” ayon sa namumuno sa Senate Committee on Finance.
Ginawa ng senador sa organizational hearing ng Senate Committee on Trade, kung saan sinabi naman ni Trade Sec. Alfredo Pascual, na kailangan nang paigtingin ang ‘industrialization.’
Paliwanag ni Pascual sa ganitong paraan, makakalikha ng mas madaming de-kalidad na trabaho, na magbibigay ng mas mataas na suweldo at hindi na aasa pa ang gobyerno sa remittances ng mga Filipino na nagtatrabaho sa ibang bansa.
Matagal nang isinusulong ni Angara ang ‘Tatak Pinoy’ na ang layon ay mapagbuti ang kapabilidad ng mga lokal na industriya para sa mas magandang kita sa mga lokal na negosyante at kanilang mga manggagawa.