Para matiyak ang kaligtasan ng mga estudyante sa pagbubukas muli ng mga klase, sinabi ng Alliance of Concerned Teachers (ACT) na dapat ay dagdagan ng Department of Education (DepEd) ang mga guro.
Ito ay magbibigay daan, ayon sa ACT, para mabawasan naman ng mga mag-aaral sa bawat klase.
Sinabi ni ACT Philippines spokesperson Vladimer Quetua, ang kakulangan ng guro ay paulit-ulit na lamang na isyu.
Aniya hanggang nitong Pebrero, higit 26,000 ang bakanteng posisyon para sa mga guro kayat lumulubo ang ‘backlog’ sa pagkuha ng mga karagdagang guro.
Pagdidiin ni Quetua napakahalaga na mabawasan ang mga estudyante sa bawat classroom para matiyak ang kanilang kaligtasan ngayon nagpapatuloy ang pandemya sa COVID-19.
Sa darating na Nobyembre, ibinahagi ni Vice President at Education Secretary Sara Duterte ang balak niya na pagpapatupad na ng 100% in-person classes.