50 pang kaso ng Omicron subvariant BA.5, naitala sa Pilipinas

Napaulat sa Pilipinas ang 50 na karagdagang kaso ng Omicron subvariant BA.5 ng COVID-19.

Sa nasabing bilang, sinabi ni Health Undersecretary Maria Rosario Vergeire na 38 indibiduwal ang mula sa Western Visayas, lima sa National Capital Region, habang pito ang returning overseas Filipinos (ROFs).

Bunsod nito, umabot na sa 93 ang kabuuang bilang ng naitalang kaso ng naturang subvariant ng nakahahawang sakit sa bansa.

Maliban dito, sinabi pa ni Vergeire na nakapagtala rin ng 11 na bagong kaso ng BA.2.12.1 subvariant at dalawa pang kaso ng BA.4 subvariant.