Operasyon ng LRT-2, extended simula ngayong araw

Extended ang operasyon ng Light Rail Transit Line 2 (LRT-2) simula sa araw ng Biyernes, Hunyo 17.

Ayon sa Department of Transportation (DOTr), layon nitong makapagsilbi sa mas marami pang pasahero, sa ilalim ng pamumuno ni Transportation Secretary Art Tugade at ng Light Rail Transit Authority (LRTA).

Mula sa orihinal na 8:30 ng gabi, aalis na ang huling commercial train sa Antipolo station bandang 9:00 ng gabi.

Samantala, mula naman sa 9:00 ng gabi, magiging 9:30 ng gabi na ang alis ng huling biyahe ng tren sa Recto station.

Inaasahan kasing dadami na ang mga empleyadong babalik sa onsite work at mga estudyanteng dadalo sa face-to-face classes.