MMDA, nakatanggap ng donasyong Essilor sunglasses para sa traffic enforcers

Nakatanggap ang Metropolitan Manila Development Authority (MMDA) ng donasyong Essilor sunglasses para sa kanilang traffic enforcers bilang pagbibigay-kilala sa kanilang tungkulin, lalo na tuwing panahon ng tag-init.

Ayon kay MMDA Chairman Romando Artes, pinasimulan ni dating MMDA Chairman Benhur Abalos ang donasyon ng Essilor Vision Foundation.

Nagpasalamat si Artes sa Essilor Vision Foundation para sa pagbibigay ng suporta sa mga traffic personnel.

“This donation would help shield their eyes from the intense glare of the sun while performing their duties this summer,” saad ng MMDA chair.

Lubos aniya ang pagkagalak ng ahensya sa lahat ng kanilang pribadong katuwang para sa pagbibigay ng suporta upang mapagbuti ang kondisyon ng kanilang mga empleyado.

Kasabay ng sunglasses, namahagi rin ang ahensya ng cap panlaban sa matinding init ng araw.