Ilang residente sa Capiz, Iloilo sinagip dahil sa pagbaha dulot ng #AgatonPH

Kaliwa’t kanan ang ikinakasang rescue operations ng Philippine Coast Guard (PCG) sa mga lugar na tinamaan ng Bagyong Agaton.

Sa Sigma, Capiz maingat na isinakay sa rescue boat ng mga tauhan ng PCG Station Capiz ang mga bata at senior citizen na na-trap sa bahagi ng Poblacion Norte.

Apat na Deployable Response Team (DRT) at karagdagang team mula sa Coast Guard Sub-stations ang rumesponde sa munisipalidad ng Panay, Maayon, Pilar at Panitan.

Patuloy kasi ang pagtaas ng tubig-baha sa nasabing lugar dahil sa walang tigil na pag-ulan.

Inilikas din ng PCG District Western Visayas ang mga residente sa Puente Bunglas Ajuy sa Iloilo.

Patuloy naman ang paalala sa publiko na maging maingat sa nararanasang sama ng panahon.