Matandang babae patay sa sunog sa Maynila

Namatay ang isang matandang babae sa sunog na tumupok sa isang residential building sa Sta. Cruz, Maynila ngayon umaga.

Sinabi ni Fire Supt. Leo Andiso ng Manila Fire Department ala-5:40 nang sumiklab ang sunog sa gusali na nasa kanto ng Alonzo at Benavidez streets.

Hindi na nakalabas ng bahay ang hindi na kinilalang 70-anyos na biktima bagamat sinabi na hirap na itong maglakad.

Nadamay pa ang siyam na bahay at 20 pamilya ang nawalan ng tirahan sa insidente.

Sinasabi na nagsimula ang sunog sa gilid ng isa sa mga natupok na bahay at kumalat na ang apoy.

Makalipas ang halos dalawang oras, naapula na ang apoy.

May isang lalaki din ang nasugatan sa pagtatangka nito na magsalba ng mga gamit.