Inamin ni Baguio City Mayor Benjamin Magalong na labis-labis ang hirap ngayon ng mga contact tracers dahil sa dami ng naitatalang Omicron variant cases.
Sa isang public briefing, sinabi ni Magalong na isang dahilan kaya tambak ang trabaho ng contact tracers ay dahil sa hindi na pagkaka-renew ng serbisyo ng 16,000 contact tracers ng Department of the Interior and Local Government.
Dati, ayon sa alkalde, sa mga kasong sanhi ng Alpha, Beta, at Delta variants ay nasa 12 hanggang 15 ang hawak ng isang contact tracer, ngayon ay nasa 30 hanggang 40 kaso na dahil sa Omicron variant.
Nangangahulugan na labis-labis na ang hawak ng mga contact tracers.
Payo niya sa mga lokal na opisyal, patutukan na lamang sa contact tracer ang close contacts sa pamilya ng nadapuan ng COVID 19.