Nanawagan si Senator Imee Marcos na magkatuwang na imbestigahan ng dalawang kapulungan ng Kongreso ang diumano’y pagkaka-hack ng automated election system (AES) ng Commission on Elections (Comelec).
Nangangamba si Marcos na mauwi sa failure of elections ang mangyayari sa papalapit na eleksyon sa Mayo.
Inihirit na rin nito sa Senate Committee on Electoral Reforms ang inihain niyang resolusyon ukol sa insidente, kung saan sinasabing nakompromiso ang data security at cybersecurity controls ng Comelec.
“Nangangamba akong mangyari ang failure of elections at ang magreresultang krisis sa Konstitusyon kapag pinagkaitan ang 67 milyong Pinoy ng kanilang tsansa na makapaghalal ng bagong presidente, bise-presidente, at Kongreso sa Mayo,” aniya.
Nabanggit na rin nito na sa isasagawang pagdinig at nais niyang dumalo ang mga opisyal ng Comelec, National Privacy Commission, Department of Information and Communications Technology Cybercrime Investigation And Coordinating Center (DICT-CICC), National Bureau of Investigation Cybercrime Division, Manila Bulletin, Parish Pastoral Council for Responsible Voting (PPCRV), National Movement for Free Elections (Namfrel), Legal Network for Truthful Elections (Lente), Democracy Watch, at Center for People Empowerment in Governance (CenPEG) /AES Watch.
Sinabi pa ng senadora na sa ilalim ng Omnibus Election pwedeng ideklara ang failure of elections dahil sa fraud o panloloko. Ayon din sa Republic Act 7166, ang mga dahilan para sa failure of election ay maaring mangyari bago pa man, sa gitna ng, o pagkatapos ng pagbilang ng mga balota.