Simula na ng paglalahad ng mga Pilipino ng nais nilang maging susunod na pinuno ng bansa.
Dakong alas-sais ngayong umaga bubuksan na ang mga polling centers sa iba’t-ibang panig ng Pilipinas at pahihintulutan na ang mga PIlipinong nasa hustong edad na pumili ng ihahalal sa iba’t-ibang posisyon.
Magtatagal ang botohan hanggang alas-singko ng hapon na siyang pinakamatagal na oras ng pagboto sa kasaysayan ng bansa.
Sakaling may mga botante pa sa bisinidad ng mga polling center pagsapit ng takdang oras, ay pahihintulutan pa ang mga itong makaboto.
Paalala ng Commission on Elections, tiyakin na maayos at maingat ang mga botante sa pagsi-shade ng mga bilog sa tabi ng mga pangalan ng mga kandidato na nais nilang ihalal.
Mariin ding ipinagbabawal ang pagkuha ng larawan ng mga balota na o pagsi-selfie habang bumoboto.
Babala ng Comelec, sakaling masita, maaring makasuhan ang isang botante ng paglabag sa election offense at makulong ng hanggang anim na taon kung mapapatunayang lumabag sa naturang batas sa ilalim ng Omnibus Election Code.
Payo pa ng Comelec sa mga botante, magdala ng kopy o ‘codigo’ ng mga pangalan ng mga kandidatong iboboto upang hindi na magtagal sa loob ng polling precinct.
Ito ay upang mapabilis ang proseso ng pagboto.