Hinikayat ni Senate Minority Leader Frank Drilon ang Palasyo ng Malakanyang na pakinggan ang panawagan ng medical experts at dating kalihim ng Department of Health (DOH) na huwag harangin ang pag-iimbestiga ng Senate Blue Ribbon Committee sa sinasabing Pharmally scandal.
Aniya, ang buong bansa ang nakatutok kayat dapat ay pakinggan ng Palasyo ang mamamayan.
“May prescription na po ang mga doctor: let’s follow the doctors’ prescription and allow an unimpeded Senate investigation into the PS-DBM anomalous transactions,” sabi nito.
Kasabay nito, pinasalamatan ng senador ang frontline medical doctors sa pagsuporta sa pagpupursige ng Senado na mailantad ang buong katotohanan sa bilyun-bilyong pisong halaga ng kontrata na nakuha ng Pharmally sa gobyerno.
Nauna na aniyang nanawagan ang Integrated Bar of the Philippines kay Pangulong Duterte na hayaan ang mga miyembro ng Gabinete na humarap sa pagdinig.
Una na rin sinabi ni Drilon na labag sa Saligang Batas ang utos ni Pangulong Duterte at may nailabas ng desisyon ang Korte Suprema ukol dito.