Kahit araw ng Linggo, ginunita ng iba’t –ibang mga labor groups ang Araw ng Paggawa o Labor Day sa pamamagitan ng mga rally sa ibat-ibang lugar sa Metro Manila at mga probinsya.
Sa Welcome Rotonda sa lungsod ng Quezon kahapon, ang grupong Kilusang Mayo Uno (KMU) at mga miyembro ng mga kaalyado nitong samahan ang naglakad tungong Espana hanggang sa Chino Roces Bridge malapit sa Malacañang.
Dito, inihayag ng mga lider ng mga grupong kabilang sa KMU ang kanilang paggiit na hindi makatotohanan ang naging pahayag ng Pangulong Aquino na bumuti ang buhay ng mga manggagawa sa ilalim ng kanyang panunungkulan.
Giit pa ng grupo, itigil na ang kontraktuwalisasyon at itaas ang sweldo sa hanay ng mga manggagawa.
Umaasa din ang iba’t-ibang grupo na tutuparin ng sinumang mananalo sa nalalapit na halalan na mahihinto ang ‘endo’ o end of contract system sa mga kumpanya sa bansa na ipinapangako ng mga ito sa taumbayan.