Ikinatuwa ni Senior Citizens Partylist Representative Rodolfo ‘Ompong’ Ordanes ang pagkakapasa ng panukala para maagang makaboto ang mga nakakatandang botante, gayundin ang mga may kapansanan.
“Sa ngalan ng milyong-milyong senior citizens, maging ng mga milyong-milyong PWDs, pinasasalamatan ko ang mga kasamahan ko sa Kamara sa pag-apruba sa House Bill 9562,” ani Ordanes.
Aniya ang HB 9562 ay ang An Act Providing for Early Voting By Qualified Senior Citizens and Persons with Disabilities in National and Local Elections.
Sinabi pa ni Ordanes na napakalaking bagay kung ganap itong magiging batas dahil mababawasan na ang mga hirap na dinaranas ng mga senior at PWDs sa tuwing may halalan sa bansa, lalo na ngayon may kinahaharap pang pandemya ang bansa.
Nangako ito na idudulog niya sa Senado ang pagsuporta sa panukala.
“Alam ko maigsi na lang ang panahon, sa Senado at sa Comelec, pero gagawin ko ang lahat para ganap itong maging batas at maipatupad na sa papalapit na halalan,” diin pa ng mambabatas.
Umaasa naman siya na masesertipikahan ng Malakanyang na ‘urgent’ ang panukalang-batas na sinuportahan ng 196 miyembro ng Mababang Kapulungan.