Sinampahan ng kasong paglabag sa Anti-Money Laundering law ang mag-asawang may-ari ng Philippine Remmitance (Philrem) Corporation dahil sa pagkakasangkot sa $81 Million money laundering scam.
Sa 17-pahinang reklamong isinampa sa DOJ laban sa may-ari ng Philrem na sina Salud at Michael Bautista, binigyang-diin ng AMLC na nagsilbing “clearing house” ang Philrem para burahin ang money trail ng $81 Million na ninakaw mula sa Bangladesh Central bank.
Kasama rin sa kinasuhan ng AMLC sa DOJ si Anthony Pelejo na Anti-Money Laundering Compliance Officer ng Philrem dahil sa isinumite nitong suspicious transaction report sa AMLC na taliwas sa naging pahayag ng mag-asawang Bautista sa isinagawang Senate hearing.
Nakasaad kasi sa report ni Pelejo sa AMLC na isang nagngangalang William Go ang nag-utos ng paglilipat ng pondo pero sa Senate hearing sinabi ng mag-asawang Bautista na si RCBC Jupiter Branch Manager Maia Santos-Deguito ang nag-utos na ideliver ang ibat ibang halaga ng pera sa Solaire Resorts and Casino, Eastern Hawaii Leisure Corporatrion ni Kim Wong at sa casino junket operator na si Weikang Xu.
Itatakda pa ng DOJ kung kailan ang preliminary investigation sa pangatlong kasong isinampa ng AMLC kaugnay ng $81 Million dirty money.
Dagdag pa ng AMLC sa kanilang reklamo, malinaw na nagkaroon ng iligal na transaksyon na isinagawa ng Philrem subalit hindi nila ito nilinaw sa kanilang mga naunang pagharap sa Senate probe.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.