Umapela si Philippine National Police (PNP) Chief, Police General Guillermo Eleazar sa publiko na iwasan ang pag-hoard ng medical equipment and supplies, partikular ang oxygen tanks.
Kasunod ito ng patuloy na pagtaas ng kaso ng COVID-19 sa bansa.
Sinabi ni Eleazar na babantayan ng kanilang hanay ang sinumang magho-hoard ng medical equipment at supplies sa panahon na nakararanas ng public health crisis.
“Sa gitna ng pagdami ng COVID-19 cases sa bansa, ang PNP ay nagpapaalala sa publiko na iwasan ang paghoard ng oxygen tanks at iba pang medical equipment at supplies,” pahayag ng hepe ng PNP.
Dagdag pa nito, “Patuloy na magbabantay ang PNP upang maiwasan ang hoarding ng oxygen tanks at iba pang medical equipment at supplies.”
Humiling ang PNP Chief na agad i-report sa mga awtoridad sakaling magkaroon ng impormasyon sa pagho-hoard ng medical equipment at supplies ng ilang indibiduwal.
Sinabi rin nito na mahigpit silang makikipag-ugnayan sa Department of Trade and Industry (DTI) ukol sa naturang usapin.
“Mahalaga ang oxygen tanks at iba pang medical equipment at supplies ngayong nasa gitna tayo ng pandemya kaya’t sana magkaroon tayo ng malasakit sa ating kapwa lalo na sa mga mas nangangailangan ng mga ito,” saad ni Eleazar.
Matatandaang sinabi ni Health Secretary Francisco Duque III na walang shortage sa suplay ng medical grade oxygen ngunit hinikayat ang publiko na huwag mag-hoard nito para sa kanilang bahay upang hindi magkulang ang suplay.