Ibinahagi ni PNP Chief Guillermo Eleazar na sa kabuuan ay nakapaghain na sila ng 121 reklamong criminal at 80 katao na ang sinampahan ng kaso bunga ng ibat-ibang uri ng cybercrimes nang magsimula ang pandemya.
Bunga aniya ang pagsasampa ng mga kaso sa pagpapakalat ng fake news, illegal online sale ng mga medical supplies at iba pang uri ng online scams.
“Patuloy ang pagtugis ng PNP sa mga walang kaluluwang pinagkakakitaan at nanamantala sa pangamba at takot ng ating mga kababayan sa COVID-19,” diin ng hepe ng pambansang pulisya.
Kabilang naman aniya sa mga nakasuhan ay 52 indibiduwal dahil sa pagpapakalat ng fake news at sila ay inasunto ng paglabag sa Unlawful Use of Means of Publication and Unlawful Utterances kasama na ang Online Libel, Anti-Cybercrime Law at Presidential Decree No. 90.
May 31 naman na inasunto dahil sa online profiteering, overpricing, hoarding at unauthorized selling of medical supplies, na nakumpiskahan ng mga gallon ng disinfectant, vitamin C capsules, forehead thermometers, face masks, at ilang litro ng isopropyl alcohol.