Namahagi ang Makati City government ng home care kits sa mga COVID-19 positive na residente ng lungsod na mayroong mild symptoms.
Ayon kay Mayor Abby Binay, naglalaman ang bawat kit ng COVID-19 Home Care hand book, alcohol, oral antiseptic, sore throat spray, fever pad, thermometer, washable at disposable face masks, oximeter, vitamins at gamot sa lagnat.
Sinabi ng alkalde na nais nilang masigurong mayroong kagamitan ang mild cases upang matulungan silang ma-monitor ang kanilang kalusugan.
Malaki aniya ang maitutulong ng laman ng kit para sa mga COVID-19 positive.
Sinabi ni Binay na layon nitong makatulong sa paggaling ng mild cases kahit nasa bahay lamang nito.
Maliban dito, makatutulong ito upang maiwasan ang paglala ng kanilang kondisyon para hindi na kailanganing pumunta pa sa ospital.