Luzon, makararanas pa rin ng pag-ulan dulot ng Habagat

Umiiral pa rin ang Southwest Monsoon o Habagat sa Luzon.

Sinabi ni PAGASA weather specialist Joey Figuracion na magdudulot ang Habagat ng maulap na kalangitan at kalat-kalat na pag-ulan, pagkidlat at pagkulog sa bahagi ng Ilocos region.

Asahan aniyang magpapatuloy ang pag-iral ng Habagat, lalo na sa Kanlurang bahagi ng bansa sa mga susunod na araw.

Sa nalalabi namang bahagi ng bansa, magiging maaliwalas ang panahon.

May tsansa aniya na makaranas ng pulo-pulong pag-ulan bunsod ng thunderstorms.

Sinabi pa ni Figuracion na walang binabantayang bagyo o sama ng panahon na posibleng pumasok sa teritoryo ng bansa.