Hiniling ni Ang Probinsyano Partylist Rep. Ronnie Ong na payagan na ng Inter-Agency Task Force (IATF) ang 100 porsyentong dine-in capacity sa mga restaurants para sa mga customer na fully vaccindated na laban sa COVID-19.
Ayon sa mambabatas, maaring magtakda ng mga lugar ang restaurants na eksklusibo lamang para sa customers na nakakumpleto na ng COVID-19 vaccine.
Bagamat nauunawaan na ang kalusugan ang prayoridad, mahalaga rin aniyang matulungan ang mga business sector na dalawang taon nang apektado ng pandemya.
Importante aniyang masimulan na muli ang pagbuhay sa domestic tourism dahil marami sa mga maliliit na munisipalidad ay umaasa sa turismo ng kanilang lugar.
Maliban dito, inirekomenda rin nito na simulan na ng malls, restaurants, hotels, resorts at iba pang kahalintulad na lugar na tumanggap ng fully vaccinated na senior citizens.