LGUs hiniling ni Sen. Bong Go na madaliin na ang pagbakuna sa A1-A3 groups

Ngayon sinimulan na ang pagbakuna sa mga essential workers sa A4 priority group, hiniling ni Senator Christopher Go sa mga lokal na pamahalaan na dalhin na sa mga medical frontliners, senior citizens at may comorbidities ang COVID 19 vaccines.

Paliwanag ni Go, sa ganitong paraan ay mapapabilis na ang vaccination rollout maging sa mga susunod na priority groups.

Aniya kung kinakailangan ay dagdagan pa ng LGUs ang vaccination sites para mas marami ang mabakunahan.

“Kung kailangan na puntahan mismo sa mga bahay ang mga matatanda at may comorbidities ay gawin na dapat agad,” bilin ng senador.

Kasabay nito, muli din sinabi ng senador na paigtingin pa ang vaccine awareness campaign para mas marami ang mahikayat na magpaturok na ng proteksyon laban sa nakakamatay na sakit.

Gayundin, hinakayat niya ang mga nasa priority groups na alisin na ang kanilang pangamba sa bakuna at aniya ang dapat katakutan ay ang COVID 19.