Siniguro ng liderato ng Kamara na kaagad nilang ipapasa ang mga mahahalagang panukalang batas upang makatulong sa bansa sa gitna ng kinakaharap na pandemya dulot ng COVID-19 sa pagbabalik ng kanilang sesyon ngayong araw.
Ayon kay House Speaker Lord Allan Velasco, sa nalalabing tatlong linggo ng second regular session ng 18th Congress ay sisikapin nilang maaprubahan sa ikatlo at huling pagbasa ang mga COVID-19 relief packages at iba pang kahalintulad na panukalang batas.
Ilan sa mga panukalang batas na target pagtibayin bago magsara ang second regular session ay ang P405.6 Billion Bayanihan 3, Resolution of Both Houses No. 2 o ang economic charter change at panukala na nagkakaloob ng amnestiya sa mga myembro ng armado at rebeldeng grupo na magbabalik loob sa pamahalaan.
Sinabi ni Velasco na nakahanda ang Kamara na talakayin ang mga panukalang batas kasama ang Senado upang matiyak na magiging ganap na batas ito bago man lang mag-adjourn.
Target din na madaliin ang pagapruba sa panukala na layong lumikha ng Philippine Virology Institute at ang medical stockpiling bill na bahagi ng pagtugon ng pamahalaan sa COVID-19 pandemic.
Sa Hunyo 5 magsisimula ang sine die adjournment ng Kongreso at magbabalik ang sesyon sa July 26 para sa ika-anim at huling State of the Nation Address (SONA) ni Pangulong Rodrigo Duterte.