Naipamahagi na ng Pamahalaang Lungsod ng Maynila sa 380,820 na mga benepisyaryo nito ang tig-P4,000 na ECQ cash assistance mula sa national government.
Batay sa ulat ng Department of the Interior and Local Government, ang Lungsod ng Maynila ang kauna-unahang LGU na nakatapos ng distribusyon ng ayuda sa buong National Capital Region.
Ayon kay Manila City Mayor Isko Moreno, hangad ng lokal na pamahalaan na agad maibigay ang nasabing ayuda sa mga Manilenyo upang matugunan ang kanilang araw-araw na gastusin.
Kaugnay nito, tuloy-tuloy rin ang pamamahagi ng food boxes sa ilalim ng COVID-19 Food Security Program ng lungsod.
Umabot na sa 230,000 na pamilya ang nakatanggap ng food subsidy para sa ikaapat na buwan ng pag-arangkada ng programa.