Kasama na rin sa mabibigyan ng ayuda ang mga ‘household’ na apektado ng COVID-19 sa ilalim ng Bayanihan 3.
Ayon kay House Committee on Ways and Means Chairman Joey Salceda, mayroong nakapaloob sa Bayanihan 3 na P5,000 hanggang P10,000 na ayuda para sa bawat household na apektado ng COVID-19 pandemic.
Paglilinaw ni Salceda, hindi ito ‘universal’ tulad sa P2,000 o P216 Billion cash asssistance na kung saan lahat ng 108 million na mga Pilipino ay makakatanggap.
Aniya, ang household ayuda na ito ay ‘targeted’ at ibabase sa pinakamahihirap na bahagi ng populasyon.
Ang ayuda para sa bawat pinakamahihirap na household ay ‘top-up’ o dagdag lamang sa mga tulong na pwedeng makuha ng mga Pilipino sa ilalim ng Bayanihan 3.
Pahayag ito ni Salceda sa kabila ng pag-amin ni Budget Secretary Wendel Avisado na walang mahuhugutang pondo ang pamahalaan para sa isinusulong na P405.6 billion na Bayanihan to Arise as One Act.