Kinumpirma ito ng tagapagsalita ng Western Mindanao Command na si Maj. Filemon Tan, at ayon sa kaniya, natagpuan ang mga bangkay alas-4:20 ng hapon ng Martes.
Narekober ang mga labi ng mga biktimang kinilalang sina Salvador Hanobas at Jaymart Hanobas sa Barangay Bayabao Poblacion.
Ayon sa Butig Municipal Police Station, nakasilid pa ang mga bangkay sa loob ng dalawang sako.
Pinalaya naman na ng grupo ang iba pang mga manggagawa na nakilalang sina Julieto Hanobas, Alfredo Anoos, Gabriel Permites, at Adones Mendez.
Matatandaang noong nakaraang Linggo, dinukot ng Maute group ang anim na manggagawa dahil akala nila ay tinitiktikan sila ng mga ito bilang utos ng pamahalaan.