Proseso sa pagkuha ng permit ng mga local drug manufacturer, pinabibilisan sa FDA

Pinabibilisan ni House Speaker Lord Allan Velasco sa Food and Drug Administration o FDA ang proseso ng pagkuha ng permit ng local pharmaceutical companies o mga gumagawa ng gamot para mapalakas ang kakayahan ng bansa kontra sa krisis-pangkalusugan gaya ngayong may COVID-19 pandemic.

Ayon kay Velasco, mayroong malaking papel ang drug companies o producers laban sa COVID-19.

Gayunman, mismong ang mga ito ay umaaray dahil sa mabagal na proseso o pagkaka-tengga ng kanilang aplikasyon sa FDA na ang iba ay tumatagal pa ng maraming taon.

Halimbawa rito ang aplikasyon para sa Certificate of Product Registration o CPR at Emergency Use Authorization o EUA permits.

Batay sa checklist ng FDA, umaabot sa walong buwan bago makumpleto ng isang kumpanya ang mga hinihinging requirement para sa CPR pa lamang.

Kailangan aniyang mawala na ang “red tape” at pagaanin o bawasan na ang mga “redundant” na requirement sa kasagsagan ng health crisis.

Nauunawaan naman aniya nito na kailangan ng pag-aaral sa mga gamot at kahalintulad, ngunit kailangan aniyang balansehin din ang sitwasyon sa panahon ng pandemya.