Isinusulong ni ACT-CIS Partylist Representative Rowena ‘Niña’ Taduran ang pagsusulong ng Unity for Smoke-Free Environment.
Sa ilalim ng House Bill 8763 o Smoke-Free Environment Act, layunin nito na amyendahan ang ilang probisyon na nakasaad sa Republic Act RA 9211 o Tobacco Regulation Act of 2003.
Partikular na pinatatanggal ni Taduran ang probisyon ng indoor Designated Smoking Areas (DSAs).
Nais din ng mambabatas na siguraduhin na ang 3% alokasyon sa Local Health Budget ay mailalaan sa tobacco-control programs and policies sa local levels.
“Ayon po sa isang pag-aaral, isang daan at sampung libong (110,000) mga Filipino ang namamatay taon-taon dahil sa mga sakit na may kinalaman sa tobacco. Ayon naman po sa Global Youth and Adult Tobacco Survey, 21.5% ng mga Filipinong nakalalanghap ng secondhand smoke sa mga opisina, workplaces, at iba pang enclosed spaces ay mga matatanda, samantalang 54.2% naman ay kabataan”, pahayag ni Taduran.
Agad naman na sinuportahan ni Dr. Mel Anthony Acauvera, ng Department of Health ang panukala ni Taduran na Smoke-Free Environment bill.