Mga manggagawa, hindi pipilitin ni Pangulong Duterte na magpabakuna vs COVID-19

Hindi pipilitin ni Pangulong Rodrigo Duterte ang mga manggagawa na magpabakuna kontra COVID-19.

Pahayag ito ng Palasyo sa gitna ng polisiya ng ilang pribadong kompanya na ‘no vaccination, no work policy.’

Ayon kay Cabinet Secretary Karlo Alexie Nograles, walang pilitan para kay Pangulong Duterte.

Bagama’t hinihimok aniya ng Pangulo ang publiko na magpabakuna, tinatanggap ng buong kalooban ng Punong Ehekutibo ang pag-aalinlangan ng publiko.

Sinabi pa ni Nograles na hindi ipipilit ng Pangulo ang pagbabakuna.

Gayunman, sinabi ni Nograles na base sa nakikita, tumatataas ang kumpiyansa ng publiko sa pagpapabakuna.