Tinupok ng apoy ang isang residential area sa Semawriyo Compound, Mapagkalinga Street sa Barangay 98, Zone 14 sa Pasay City.
Ayon kay Supt. Douglas Guiyab, ang City Fire Marshall ng Pasay, nagsimula ang sunog kaninang alas kuwatro ng hapon at bandang 4:19 pm nang itaas ito sa ikalimang alarma.
Gawa aniya sa light materials ang mga bahay at dahil sa malakas na hangin, mabilis kumalat ang apoy.
Bandang 5:42 naman ng hapon nang ideklarang fire under control ang naturang sunog.
Isang buntis na nakilalang si Sandy Constantino, 26 anyos, ang nailigtas sa sunog matapos na magtago nito sa banyo.
Agad namang isinugod sa Pasay City General Hospital ang biktima matapos makaranas ng slight suffocation.
Aabot sa labinglimang bahay o tatlumpung pamilya at tinatayang aabot sa 1.2 million pesos ang halaga ng napinsala ng naturang sunog.