Inaasahan na sa susunod na anima hanggang 12 oras ay tatama sa kalupaan ang bagyong Auring sa Dinagat Islands – Eastern Samar – Leyte area.
Ayon sa PAGASA, maaring lalo pang humina ang bagyo bago ang pagtama nito sa kalupaan dahil sa ‘high vertical wind’ na dala ng northeast monsoon o amihan.
Kaninang alas-4 ng madaling araw huling namataan ang bagyo sa layong 195 kilometro silangan ng Maasin City, Southern Leyte na may lakas ng hangin na 45 kilometero kada oras at bugso na hanggang 55 kilometro kada oras.
Ito ay kumikilos west northwestward sa bilis na 15 kilometero kada oras.
Sinalanta na nito ang Surigao del Sur, partikular na ang Tandag City, Linggo ng umaga.
Base sa ulat ng DSWD – Caraga, kabuuang 3,858 pamilya na may katumbas na 14,233 indibiduwal ang apektado at hindi bababa sa 140 kabahayan ang napinsala.