Nagbuga ng abo at nagbabagang bato ang bulkang Kanlaon sa Negros Occidental ngayong gabi.
Ayon sa Philippine Institute of Volcanology and Seismology naganap ang pagsabog dakong alas 6:20 pm.
Tumagal ang ash explosion ng 12 minuto.
Umabot din ang pluma ng abo ng hanggang 1,500 metro ang taas.
Narinig ang dagundong ng pagsabog hanggang sa Sitio Guintubdan, Bgy. Ara-al at Bgy. Yubo, sa La Carlota City sa Negros Occidental hanggang sa Bgy. Pula sa Canlaon City, Negros Oriental.
Ayon sa mga residenteng malapit sa bulkan, tanaw ang pagbulusok ng mga bato at abo mula sa tuktok ng bundok.
Gayunman, wala namang naitalang pag-agos ng lava mula sa bunganga ng bulkan sa kasalukuyan.
Ang Mt. Kanlaon ay matatagpuan sa pagitan ng Negros Occidental at Negros Oriental.
Nananatili sa Alert Level 1 sa Mt. Kanlaon.
Dahil dito, patuloy na ipinaiiral ang 4-kilometer radius Permanent Danger Zone sa paligid ng bulkan.