Kasabay ng mariin niyang pagtanggi sa pagkakadawit niya sa eskandalo, ipinangako ng ng junket operator na si Kim Wong na ilalantad niya ang mga pangalang alam niyang utak ng $81 million money laundering scam na kaniya ring kinasangkutan.
Ayon kay Wong, wala siyang kinalaman sa money laundering dahil bago pa man makarating sa mga casino ang pera mula sa ibang bansa, dumaan na ito sa mga bangko at money changers.
Bagaman tumanggi si Wong na ilahad sa kaniyang panayam sa Inquirer ang pangalan ng sa tingin niya ay utak ng pagpasok ng dirty money sa bansa, nangako naman siya na ilalantad niya ito sa Senado.
Tinukoy lamang ni Wong ang mga sangkot dito bilang Mr. D at Mr. J.
Napag-alaman ng Inquirer na ang tinutukoy ni Wong na Mr. J ay isang matagal nang kasosyo sa negosyo, na isang casino junket agent na nagdadala ng malalaking kliyente sa kaniya.
Ngunit noong 2014, malalaki ang talo ng mga kliyente ng nasabing Mr. J sa casino, kaya nagkaroon ang mga ito ng utang kay Wong na nagkakahalaga ng P450 million.
Pinakilala umano sa kaniya ni Mr. J si Mr. D na siyang nangakong tutulong na mabayaran ang malaking utang sa kaniya at na magpapasok ng mga investments sa Pilipinas.
Ani Wong, nais niyang tulungan ang pamahalaan sa pamamagitan ng pagsasabi ng mga bagay na kaniyang nalalaman, kasabay na rin ng paglilinis ng kaniyang pangalan.
Umamin din si Wong na minsan na niyang nakilala si RCBC president Lorenzo Tan, matagal na panahon na ang nakakaraan, pati na rin ang negosyanteng si William So Go.
Ngunit tulad nina Tan at Go, naniniwala si Wong na dinamay lang ni dating RCBC branch manager Maia Deguito si Tan sa eskandalong ito.
Dagdag pa ni Wong, labis na naapektuhan ng pagkakadawit ng kaniyang pangalan sa isyung ito ang kaniyang mga negosyo dahil tinatalikuran na aniya siya ng kaniyang mga kliyente.