#StopTheKillingsPH, #PulisAngTerrorista, #JusticeforSonyaGregorio trending sa Twitter kasunod ng pagpatay ng isang pulis sa mag-ina sa Tarlac

Top 5 sa Philippine trends sa Twitter ang mga hashtag na mayroong kaugnayan sa pagpatay ng isang pulis-Paranaque sa mag-ina sa Paniqui, Tarlac.

As of 7:45 ng umaga ngayong Lunes, December 21, number 1 trending sa Philippine trends sa Twitter ang hashtag #StopTheKillingsPH.

Sinundan ito ng mga hashtag na #PulisAngTerrorista, #EndPoliceBrutality, #JusticeforSonyaGregorio, at #MYFATHERISAPOLICEMAN

Ang mag-inang Sonya Gregorio, 52 anyos at Anthony Gregorio, 25 ay nasawi matapos barilin ng pulis na si Senior Master Sergeant Jonel Nuezca, 46 anyos.

Si Nuezca ay aktibong pulis at nakatalaga sa Parañaque City Crime laboratory.

Hindi pa malinaw kung ano ang motibo sa krimen pero makiki sa video, na inaawat ng kaniyang ina si Anthony na nakikipagtalo sa pulis.

Sa dulong bahagi ng video, makikita ang isang dalagita na anak umano ng suspek na nakipagsigawan naman sa biktimang si Sonya.

Sinagot-sagot ni Sonya ang dalagita habang patuloy na inaawat ang anak niyang si Anthony at doon na binaril ng suspek ang mag-ina.

Si Nuezca ay sumuko din kagabi sa Chief of Police ng Rosales Pangasinan police station.